Milli Məclisin deputatı Sahib Alıyev Türkiyə ordusunun Avropada ən güclü ordu olduğunu iddia edib. “Yaxşı məlumdur ki, Türkiyə Ordusu Avropada ən güclü ordudur”, deyə o bildirib.
“Fakt Yoxla” bu iddianın doğru olub olmadığını yoxlayıb.
“Global Firepower” tədqiqat mərkəzi 2006-cı ildən dövlətlərin müdafiə qabiliyyətini müqayisə edən reytinq cədvəli dərc edir. Reytinq hazırlanarkən şəxsi heyət, hava gücü, quru gücü, dəniz gücü, logistika və maliyyə kimi meyarlar nəzərə alınır.
Mərkəzin 2025-ci ildə dərc etdiyi reytinq cədvəlinə əsasən, Türkiyə 9-cu yerdə qərarlaşmaqla dünyanın 10 ən güclü ordusu sırasındadır. Bununla belə, Avropa ölkələri arasında Birləşmiş Krallıq 6-cı, Fransa 7-ci yeri tutmaqla Türkiyəni müdafiə qabiliyyəti baxımından qabaqlayırlar.
2024-cü ildə Türkiyə Avropa ölkələri arasında reytinqdə yalnız Birləşmiş Krallıqdan geri qalırdı. Türkiyə 8-ci, Birləmiş Krallıq isə 6-cı yerdə qərarlaşmışdı. Fransa ilk onluqda yox idi.
Yenə eyni platformanın araşdırmasına görə, NATO ölkələri arasında Türkiyə 4-cü ən güclü orduya malik ölkədir. İlk üçlükdə olan ölkələr isə sırayla ABŞ, Birləşmiş Krallıq və Fransadır.
2025 Qlobal Atəş Gücü reytinqinə əsasən, Cənubi Qafqazda ən güclü ordu Azərbaycana məxsusdur (PwrIndx: 1.2531), onu Ermənistan (2.0373) və Gürcüstan (2.0695) izləyir.
“Fakt Yoxla”nın gəldiyi nəticəyə görə, Sahib Alıyevin iddiası əsasən doğrudur.
